نفسي ألاقي حد من النخبة المثقفة اللي تعدت الستين والسبعين كاتب علي تويتر إنة محبط أو متضايق أو مكتئب زي ما إحنا بنعمل بالظبط أو ألاقية حاطط صورة صفحتة الرسمية في الفيس بوك سواد وكاتب ستاتس كئيبة وأنة قرفان من اللي بيحصل زي برضة ماحنا بنعمل بالظبط مش عارف لية جيلنا علي صغر سنة هو اللي بيكتئب وبيتنيل علي عينة في الوقت اللي هما ورجليهم والقبر بتلاقيهم بيطلعوا في التوك شوز والجرايد والمجلات بالكرافتات المزهزهة والبدل المكوية وبيتكلموا بكل حماس وأمل وسعادة عن الأحداث المهببة اللي بتحصل حوالينا من غير ما يجرالهم حاجة نفسي أشوف حد من النخبة زعلان بجد ومن زعلة جت لة سكتة قلبية مات في نص البرنامج مش عارف لية مابلاقيش كدة لية الإحساس مقصور علي جيلنا بس وعندهم هما إستثناء لية الإكتئاب والإحباط علامة مميزة عندنا وهما مابيكتئبوش علي الإطلاق ؟يمكن علشان لسة إحنا هبل وبنصدق فابنتصدم وهما فهموا من زمان إنة ماحدش بيكتئب قوي إلا لما بيصدق قوي فبطلوا يحسوا ويصدقوا ولا يمكن علشان هما عارفين إنة كل اللي بيحصل دة تمثيلية وأخرها معروف ودورهم فيها محفوظ فعلي إية التعب ولية القلق ؟ بجد نفسي أعرف ...
ليست هناك تعليقات:
إرسال تعليق